Dar es Salaam
Mkuu wa Wilaya ya Ilala, Mhe. Edward Mpogolo, amesema kuwa wahariri wa vyombo vya habari wana nafasi kubwa ya kusaidia taifa kupambana na bidhaa bandia na kulinda ushindani wa haki katika soko la Tanzania.
Akizungumza kwa niaba ya Mkuu wa Mkoa wa Dar es Salaam, Mhe. Albert Chalamila, katika semina ya Tume ya Ushindani (FCC) na Jukwaa la Wahariri Tanzania (TEF) jijini Dar es Salaam Februari 23, 2026, amesema mafunzo hayo ni muhimu kwa kuwa yanawapa wahariri uelewa mpana wa majukumu ya FCC pamoja na mabadiliko ya sheria yanayohusu ushindani wa kibiashara.
Amesema kuwa mara nyingi taasisi hufanya mikutano ya waandishi wa habari bila kuwahusisha wahariri, hali inayoweza kuathiri uchambuzi wa kina wa habari za biashara na uchumi. Aidha, amebainisha kuwa kuwapa wahariri mafunzo kutasaidia kuandika habari zenye uchambuzi sahihi, zenye takwimu na vielelezo, pamoja na kuelimisha umma kuhusu masuala ya ushindani wa soko.
Pia ameongeza kuwa hapo awali kulikuwa na mkanganyiko wa kutofautisha majukumu ya FCC na taasisi nyingine za udhibiti, lakini kupitia elimu hiyo, uelewa utaongezeka na kusaidia jamii kutambua vyema nafasi ya Tume katika kulinda mlaji na kuimarisha soko la ndani.
Amesema kuwa vitendo vya kuingiza bidhaa kutoka nje na kubadilisha vifungashio ili kuonekana kama vya ndani vinaharibu ushindani wa haki na kuwaumiza wazalishaji wa ndani, wakulima, wafanyakazi wa viwandani na wawekezaji. Aidha, amebainisha kuwa bidhaa bandia zikiuzwa kwa bei ya chini huathiri mzunguko wa soko, kupunguza mapato ya serikali na kudhoofisha uchumi wa taifa kwa ujumla.
Pia ameongeza kuwa ushirikiano kati ya FCC, forodha, BRELA na vyombo vya habari umeanza kuleta matokeo chanya kwa kupunguza uingizaji wa bidhaa feki, hususan vifaa vya kielektroniki vilivyokuwa vikiingia katika soko la Kariakoo. Amesema juhudi hizo zinapaswa kuendelezwa na kuimarishwa zaidi ili kulinda maslahi ya Watanzania na kuhakikisha wafanyabiashara halali wananufaika na soko.
Amesema kuwa ongezeko la biashara na upanuzi wa bandari unahitaji kuimarishwa kwa mifumo ya ukaguzi na udhibiti ili kuhakikisha bidhaa zinazoingia nchini zinakidhi viwango vinavyotakiwa na haziharibu ushindani wa soko. Aidha, amebainisha kuwa Serikali iko tayari kushirikiana na wahariri katika kuibua, kuchunguza na kupinga vitendo vya viwanda bubu pamoja na bidhaa zisizo halali.
Kwa upande wake, Kaimu Mkurugenzi Mkuu wa FCC, Bi. Khadija Ngasongwa, amesema kuwa semina hiyo imelenga kutoa elimu kuhusu utekelezaji wa Sheria ya Ushindani ya mwaka 2003 na marekebisho yanayopendekezwa, pamoja na muswada wa Sheria ya Ahueni ya Biashara (Trade Remedies) unaotarajiwa kuimarisha ulinzi wa soko la ndani.
Aidha, amebainisha kuwa sheria hizo zinalenga kuimarisha ushindani wa haki, kulinda watumiaji dhidi ya upotoshaji wa soko na kudhibiti bidhaa bandia. Pia ameongeza kuwa Tume hufanya uchambuzi wa miunganiko na ununuzi wa makampuni ili kuhakikisha soko linaendelea kuwa na ushindani wa haki bila kuathiri maslahi ya walaji.
Naye Kaimu Mwenyekiti wa TEF, Bw. Bakari Kimwanga, amesema kuwa wahariri wataendelea kushirikiana na FCC katika kuelimisha umma kuhusu masuala ya ushindani kwa manufaa ya taifa. Aidha, amebainisha kuwa vyombo vya habari vina wajibu wa kutumia kalamu zao kwa weledi, uadilifu na uzalendo katika kulinda uchumi wa nchi.
