Raia watatu wa Marekani waliofungwa jela kwa jaribio la mapinduzi lililofeli katika Jamhuri ya Kidemokrasia ya Congo walikabidhiwa mikononi mwa Marekani siku ya Jumanne, maafisa walisema, kufuatia mazungumzo ya ngazi ya juu kati ya nchi hizo mbili kuhusu usalama na mikataba ya madini, ofisi ya rais wa Congo iliambia Reuters siku ya Jumanne.
Ofisi ya rais ilisema Wamarekani hao wamehamishiwa kwa mamlaka ya Marekani baada ya kifungo chao kubadilishwa wiki iliyopita ili kutumikia muda wao nyumbani.
Makubaliano ya kuwakabidhi Wamarekani hao yalikamilishwa wakati mshauri mkuu wa Rais wa Marekani Donald Trump barani Afrika, Massad Boulos, aliposafiri hadi Congo kufanya mikutano na Rais Felix Tshisekedi katika mji mkuu Kinshasa.
Kuachiliwa kwao kunakuja wakati wa kushadidi mazungumzo kati ya Washington na Kinshasa.
Ushirikiano kati ya nchi
‘‘Marekani iko tayari kuchunguza ushirikiano muhimu wa madini,’’ Wizara ya Mambo ya Nje iliiambia Reuters mwezi uliopita, baada ya Congo kuweka mkataba wa madini kwa ajili ya usalama kwa utawala wa Trump.
Kabla ya safari hiyo, mjumbe maalum wa Trump wa kukabiliana na mateka alikuwa amemtaka Tshisekedi kuwaachilia Wamarekani hao.
"Hii inaonyesha kuwa ushirikiano kati ya mataifa hayo mawili unazidi kuimarika na kuimarika," Tina Salama, msemaji wa Tshisekedi alisema. Ikulu ya White House haikujibu ombi la maoni.
Wizara ya Mambo ya Nje ilisema katika barua pepe kwamba kuleta Wamarekani nyumbani ni kipaumbele cha juu kwa utawala.
Maslahi ya Usalama
Joseph Szlavik-Soto, mshawishi anayefanya kazi Kinshasa, alisema Wakongo pia wamekubali kulipa uharibifu uliosababishwa na waandamanaji waliovamia ubalozi wa Marekani na misheni zingine mapema mwaka huu.
Wizara ya Mambo ya Nje ilikataa kutoa maoni kuhusu suala hilo.
Congo inataka Marekani kuchukua nafasi kubwa zaidi katika kuilinda nchi hiyo iliyoharibiwa na vita, ambapo mapigano mashariki mwa nchi yameibua hofu ya kutokea mzozo mkubwa zaidi wa kikanda.
Ghasia zimeongezeka tangu Januari, wakati waasi wa M23 wanaoungwa mkono na Rwanda walipopiga hatua haraka, na kuteka miji miwili mikubwa mashariki mwa nchi hiyo.
