Mwisho wa karne ya 19 ulikuwa kipindi kigumu sana kwa Afrika. Mataifa yenye nguvu kutoka Ulaya yalikuwa yakigawana bara la Afrika, yakiteka maeneo na kuyaweka chini ya utawala wa kikoloni. Katika mazingira hayo, Ethiopia iliingia katika historia kwa tukio lililowashangaza wengi: jeshi la Kiafrika liliweza kulishinda jeshi la Italia katika Vita vya Adwa mwaka 1896.
Aliyekuwa katikati ya tukio hilo alikuwa Emperor Menelik II, mtawala wa Ethiopia aliyekuwa na uwezo wa kuchanganya nguvu za kijeshi, diplomasia na maandalizi ya muda mrefu ili kuilinda nchi yake dhidi ya kugeuzwa koloni.
Menelik II alizaliwa mwaka 1844 na akawa mfalme wa Ethiopia mwaka 1889. Wakati huo Italia ilikuwa tayari imeanza kujenga himaya yake katika eneo la Eritrea na ilikuwa ikitafuta kupanua ushawishi wake katika Pembe ya Afrika.
MGOGORO KATI YA MENELIK NA ITALIA
Katika mwaka huo wa 1889, Menelik alisaini Mkataba wa Wuchale na Italia. Mkataba huo ulikuwa na matini za Kiitalia na Kiamhari, lakini kulikuwa na tofauti muhimu katika tafsiri yake.
Italia ilidai kwamba mkataba huo uliipa mamlaka ya kuiwakilisha Ethiopia katika mahusiano yake na mataifa ya nje. Menelik alikataa tafsiri hiyo kwa sababu angeiona Ethiopia ikipoteza uhuru wake wa kufanya maamuzi kama taifa huru.
Mwaka 1893 Menelik aliukataa rasmi mkataba huo. Mgogoro ukaendelea na hatimaye ukageuka kuwa vita.
Lakini Menelik hakusubiri vita vianze ndipo aanze kujiandaa.
MENELIK ALIJIANDAA KWA KUNUNUA SILAHA
Menelik alielewa kwamba Italia ilikuwa na jeshi lenye silaha za kisasa. Kwa hiyo, Ethiopia nayo ilihitaji kuboresha uwezo wake wa kijeshi Kupitia diplomasia na biashara na mataifa ya nje, Ethiopia ilinunua kiasi kikubwa cha bunduki na silaha nyingine. Hivyo, wakati Italia ilipokuja na silaha za kisasa, haikukutana na Waethiopia waliokuwa wanategemea mikuki na panga pekee Menelik alijenga uwezo wa kijeshi ambao uliifanya Ethiopia iwe na uwezo wa kukabiliana na jeshi la Ulaya.
#johniAfrikaTz
